सम्पूर्ण देशभक्त र प्रगतिशील श्रमजीवी पत्रकारहरुलाई संगठित गर्ने, उनीहरुको हक, हित र अधिकारका लागि काम गर्ने तथा राष्ट्रिय मुक्ति र जनमुक्ति आन्दोलनका पक्षमा प्रचार आन्दोलनलाई संगठित गर्ने लगायतका प्रमुख उद्देश्य राखेर ०६१ पुसमा रोल्पाको इरिबाङमा युद्ध पत्रकारका रुपमा क्रियाशील जनपक्षीय पत्रकारहरुको राष्ट्रिय भेला आयोजना गरियो ।

अहिले पनि हामी वर्गसङ्घर्षमै छौं। हामीले सरकार, सदन र सडक तीनवटै मोर्चाको सङ्घर्षमार्फत नेपालमा समाजवादी क्रान्ति सम्पन्न गर्ने, नेपाली मोडेलको २१औं शताब्दीको समाजवाद स्थापना गर्ने भनेका छौं ।  नयाँ ढङ्गको सङ्घर्ष मोर्चा अगाडि बढाउने सन्दर्भमा सञ्चारजगतको भूमिका महत्त्वपूर्ण हुन्छ । त्यसैले प्रचारयुद्धको विशेष महत्त्व छ । ‘प्रेस सेन्टर नेपाल’ले महत्वपूर्ण भूमिका निर्वाह गर्न सक्नुपर्छ । शुभकामना  !

हाम्रो पार्टीले विगतदेखि नै प्रेस स्वतन्त्रतालाई सम्मान गर्दै अगाडि बढेको छ। हामीसँग प्रेसलाई लुकाउनुपर्ने केही पनि छैन। प्रविधिको विकाससँगै प्रेसले पनि आफूलाई समयानुकूल परिमार्जन गर्दै जानुपर्ने आवश्यकता छ। जनमतलाई प्रभावित बनाउन वा जिम्मेवार बनाउन प्रेसको ठूलो भूमिका हुन्छ। पार्टी अव्यवस्थित भएको अवस्थामा समेत प्रेस सेन्टरलाई व्यवस्थित बनाउने तपाईंहरू सबैलाई विशेष धन्यवाद ज्ञापन गर्दछु ।